وزیر اعلیٰ خیبرپختونخوا سہیل آفریدی کا کہنا ہے کہ کے پی کابینہ عمران خان کے مشورے سے تشکیل دوں گا۔
وزیر اعلیٰ کے پی سہیل آفریدی نے میڈیا سے گفتگو کرتے ہوئے ہا کہ وزیراعظم نے فون کرکے مبارکباد دی ان سے کہا عمران خان سے ملنے دیں، شہباز شریف نے کہا بتاتا ہوں لیکن ابھی تک جواب نہیں آیا۔
سہیل آفریدی نے کہا کہ عمران خان سے ملاقات کے لیے اڈیالہ جیل آیا ہوں، ان کو کابینہ کے حوالے سے تجاویز پیش کروں گا۔
انہوں نے کہا کہ بطور وزیر اعلیٰ ایڈوائزری کونسل میں بناؤں گا، ہمارے لیے سب سے پہلے پاکستان ہے اس کے بعد باقی چیزیں ہیں۔
وزیر اعلیٰ نے کہا کہ تحریک انصاف کے پاس پرامن احتجاج کا آپشن موجود ہے۔
گزشتہ دنوں پی ٹی آئی رہنما سلمان اکرم راجہ کا کہنا تھا کہ سہیل آفریدی قبائلی علاقے سے تعلق رکھنے والے پہلے وزیر اعلیٰ ہوں گے۔
ان کا کہنا تھا کہ کے پی کی نئی کابینہ میں نئے چہرے شامل کیے جائیں گے، ہم دہشت گردوں کے لیے نرم گوشہ نہیں رکھتے، ہم چاہتے ہیں کہ صوبے میں مزید خونریزی نہ ہو۔
واضح رہے کہ سہیل آفریدی کا تعلق ضلع خیبر سے ہے اور وہ پی کے 70 سے رکن صوبائی اسمبلی ہیں، وہ پارٹی کی سینٹرل ایگزیکٹو کمیٹی کے رکن بھی ہیں۔
وہ برسوں سے پی ٹی آئی میں سرگرم رکن رہے ہیں اور اس سے قبل کافی عرصے تک کے پی میں انصاف اسٹوڈنٹس فیڈریشن کے سربراہ رہ چکے ہیں۔
موجودہ حکومت میں سہیل آفریدی نے ابتدائی طور پر وزیر اعلیٰ کے معاون خصوصی برائے مواصلات و تعمیرات کے طور پر کام کیا۔
صوبائی کابینہ میں ردوبدل کے بعد انہیں ہائر ایجوکیشن کا وزیر مقرر کیا گیا۔
پی ٹی آئی کی اعلیٰ قیادت نے اندرونی اختلافات کے درمیان گنڈا پور کو ہٹانے کے فیصلے کی تصدیق کر دی۔
