کراچی ٹریفک پولیس نے ممکنہ شدید بارشوں کے پیش نظر عوام کو کیا ہدایت دی؟

کراچی ٹریفک پولیس نے شہر میں ممکنہ شدید بارشوں کے پیش نظر ہدایات دی ہیں، شہریوں کو نشیبی راستوں میں جانے سے گریز کا کہا گیا ہے۔
تفصیلات کے مطابق کراچی ٹریفک پولیس نے شہریوں کو موسلادھار برسات کی پیشگوئی کے بعد نشیبی علاقوں اور راستوں میں جانے سے گریز کرنے کی ہدایت کی ہے جبکہ شدید بارشوں کے پیش نظر متبادل راستے استعمال کرنے کی ہدایت کی گئی ہے۔
ٹریفک پولیس نے کہا کہ پاور ہاؤس چورنگی سے ناگن چورنگی کا راستہ بارش سے شدید متاثر رہتا ہے، ڈرائیورز یو ٹرن لےکر گودرا سے براستہ شفیق موڑ سے نیو کراچی جا سکتے ہیں۔
سخی حسن سے ناگن چورنگی جانے کیلئے قلندریہ چوک اور انڈا موڑ سے ہی شہری فورکے چورنگی جا سکتے ہیں، بورڈ آفس سے آنے والوں کو کےڈی اے چونگی سے ڈائیورشن دے کر شاہراہ نور جہاں بھیجا جائے گا۔
ٹریفک پولیس نے کہا کہ نارتھ ناظم آباد بلاک این، ایچ، آئی جانے کیلئے ضیاالدین اسپتال سے شفیق موڑ نیوکراچی جاسکتے ہیں۔
شارع فیصل پر نرسری، لال کوٹھی، بلوچ کالونی کے مقامات بارش سے متاثرہوتے ہیں، کارساز، ڈرگ روڈ انڈر پاس، کالا چھپرا اور مادام کٹ بارش کے پانی سے متاثر ہوتے ہیں۔
ٹریفک پولیس نے کہا کہ ایئرپورٹ جانے والے سندھی مسلم سوسائٹی طارق روڈ، آغا خان روڈ استعمال کرسکتے ہیں، ایئرپورٹ جانے والے جوہر چورنگی اور پہلوان گوٹھ کا متبادل راستہ استعمال کرسکتے ہیں۔
ڈیفنس سے ایئرپورٹ آنے والے قیوم آباد، شاہراہ بھٹو اور شاہ فیصل کالونی استعمال کرسکتے ہیں، ڈیفنس سے ایئرپورٹ آنے والے شاہراہ فیصل سے اسٹار گیٹ کا راستہ اختیار کرسکتے ہیں۔
ٹریفک پولیس کا مزید کہنا تھا کہ ایئرپورٹ سے ڈیفنس جانے والے افراد ملیر ہالٹ اور شاہراہ بھٹو کا راستہ استعمال کرسکتے ہیں۔