جسٹس طارق محمود جہانگیری کو کام سے روکنے کا تحریری حکم نامہ جاری

اسلام آباد: جسٹس طارق محمود جہانگیری کو کام سے روکنے کا تحریری حکم نامہ جاری کردیا گیا۔
تفصیلات کے مطابق اسلام آباد ہائیکورٹ نے جسٹس طارق محمود جہانگیری کو عدالتی کام سے روکنے کا دو صفحات پر مشتمل تحریری حکم نامہ جاری کر دیا۔
تحریری حکم نامہ چیف جسٹس سرفراز ڈوگر اور جسٹس اعظم خان پر مشتمل دو رکنی بینچ نے جاری کیا، جو اے آر وائی نیوز کو موصول ہوگیا ہے۔
عدالت نے قرار دیا کہ سپریم جوڈیشل کونسل کے فیصلے تک جسٹس طارق جہانگیری عدالتی فرائض انجام نہیں دے سکیں گے۔
حکم نامے میں کہا گیا ہے کہ کیس میں حساس نوعیت کے سوالات موجود ہیں، بالخصوص جج کی اہلیت کا سوال بنیادی نوعیت رکھتا ہے۔
عدالت کو بتایا گیا کہ جسٹس طارق جہانگیری کے خلاف سپریم جوڈیشل کونسل میں ایک شکایت بھی زیرِ التوا ہے، لہٰذا اس معاملے میں کونسل کے فیصلے تک مزید کارروائی مؤخر کی جاتی ہے۔
عدالت نے حکم دیا کہ اٹارنی جنرل آف پاکستان اور ایڈووکیٹ جنرل اسلام آباد 21 اکتوبر کو عدالت کی معاونت کریں، اس کے علاوہ ایک اور درخواست گزار کی کیس میں فریق بننے کی درخواست بھی منظور کرلی گئی ہے۔