لاہور: جنوبی پنجاب کے عہدیداروں اور ٹکٹ ہولڈرز نے ٹی ایل پی سے علیحدگی کا اعلان کردیا۔
سابق عہدیدار کالعدم ٹی ایل نے نیوز کانفرنس کرتے ہوئے کہا کہ جماعت ملک دشمن قوتوں کو فائدہ پہنچا رہی ہے، ملکی سلامتی اور پاک فوج کے ساتھ کھڑے ہیں۔
سابق عہدیدار نے کہا کہ ٹی ایل پی کے لانگ مارچ سے ملک کو نقصان ہوا، پاک فوج نے بھارت کو جنگ میں شکست دی، دشمن ملک میدان جنگ میں ہمیں شکست نہ دے سکا، دشمن اب پاکستان کے خلاف پراکسی جنگ لڑ رہا ہے۔
انہوں نے کہا کہ خارجی دہشت گردوں نے بھی ٹی ایل پی سے وابستگی کا اعلان کیا۔
سابق عہدیدار کالعدم ٹی ایل پی نے کہا کہ پاک فوج نے دشمن کی سازش کو ناکام بنادیا، پاکستان کے لیے ہماری جان بھی حاضر ہے۔
ٹکٹ ہولڈرز نے کہا کہ پاکستان کلمہ کے نام پر حاصل کیا گیا، دشمن قوتوں کے عزائم کو ناکام بنائیں گے، پاکستان تاقیامت قائم رہے گا کوئی اس کی طرف میلی آنکھ سے نہیں دیکھ سکتا۔
محمد حسین بابر نے کہا کہ کالعدم ٹی ایل پی سے بغیر کسی دباؤ کے علیحدہ ہورہے ہیں۔ راؤ عارف سجاد نے کہا کہ پاکستان انتشار کا متحمل نہیں ہوسکتا۔
