جنوبی لبنان کے قصبے تول میں اسرائیل کا ڈرون حملہ

جنوبی لبنان کے قصبے تول میں اسرائیل نے ڈرون حملہ کیا ہے جس کے باعث 2 افراد شہید اور 2 زخمی ہو گئے۔
عرب میڈیا کا اس حوالے سے کہنا ہے کہ حملے میں اسرائیل نے کار کو ڈرون سے نشانہ بنایا، جس کے نتیجے میں شہادتیں ہوئیں۔
مشرقی اور جنوبی لبنان میں گزشتہ روز بھی اسرائیلی فضائی حملوں میں 4 افراد جام شہادت نوش کرگئے تھے۔
اسرائیل نے دعویٰ کیا تھا کہ گزشتہ روز کیے گئے حملوں میں مزاحمتی تنظیم حزب اللّٰہ کے ٹھکانوں کو ٹارگٹ کیا تھا۔
عرب میڈیا کا کہنا ہے کہ اسرائیل نے حزب اللّٰہ کے ساتھ نومبر 2024ء کے معاہدے کی تقریباً روزانہ کی بنیاد پر خلاف ورزی جاری رکھی ہوئی ہے۔
دوسری جانب حماس نے غزہ اور مغربی کنارے پر امریکا کے دوٹوک موقف کو سراہتے ہوئے جنگ بندی معاہدے کو کامیابی سے پورا کرنے کے عزم کا اعادہ کیا ہے۔
غزہ میں حماس تحریک کے ترجمان ہزیم قاسم نے ٹیلیگرام پیج پر جاری کردہ بیان میں کہا کہ حماس ”اس معاہدے کی کامیابی کو یقینی بنانے اور زمین پر اس کے نفاذ کو یقینی بنانے کی خواہاں ہے“۔
قاسم نے زور دے کر کہا کہ حماس کو مصر، قطر اور ترکی کی واضح ضمانتیں مل گئیں، نیز امریکا کی طرف سے براہ راست تصدیق بھی ملی کہ جنگ مو?ثر طریقے سے ختم ہو گئی ہے۔
انہوں نے امریکی صدر ٹرمپ کے بیانات کی تعریف کرتے ہوئے کہا کہ واشنگٹن کا مقبوضہ مغربی کنارے کو اسرائیل سے منسلک کرنے کو مسترد کرنا مثبت ہے۔
فلسطینی اس وقت لیڈر کے بغیر ہیں، محمود عباس بزرگ ضرور ہیں لیڈر نہیں : ٹرمپ
انہوں نے اسرائیل پر اپنی ذمہ داریوں کو نبھانے کے لئے دباؤ کا مطالبہ کیا، خاص طور پر جارحیت کو روکنا، غزہ کی پٹی پر محاصرے کو اٹھانا اور انسانی امداد میں فوری اور مناسب داخلے کی اجازت دینا۔