اسرائیل اور حماس کے درمیان غزہ جنگ بندی معاہدہ نافذ العمل ہوگیا

اسرائیل اور فلسطینی مزاحمتی تنظیم حماس کے درمیان غزہ جنگ بندی معاہدہ باضابطہ طور پر نافذ العمل ہوگیا۔
ٹائمز آف اسرائیل کی رپورٹ کے مطابق غزہ پٹی میں جنگ بندی باضابطہ طور پر دوپہر سے شروع ہوگئی ہے۔ اسرائیلی دفاعی فورسز (آئی ڈی ایف) نے بتایا کہ اس نے حماس کے ساتھ ہونے والے معاہدے کے تحت فوجیوں کو متفقہ تعیناتی لائنوں پر واپس بلا لیا ہے۔
اسرائیلی فوج نے کہا کہ مقامی وقت کے مطابق دوپہر 12:00 بجے سے آئی ڈی ایف کے دستوں نے جنگ بندی اور یرغمالیوں کی واپسی کے معاہدے کے مطابق نئی تعیناتی لائنوں پر پوزیشن سنبھال لی ہے۔
آئی ڈی ایف کے مطابق جنوبی کمانڈ میں آئی ڈی ایف کے دستے علاقے میں تعینات ہیں اور کسی بھی فوری خطرے کو ختم کرنے کیلیے آپریشن جاری رکھیں گے۔
72 گھنٹوں کے اندر یعنی پیر کی دوپہر تک حماس کو اپنے زیر حراست 48 یرغمالیوں کو رہا کرنا ہے جن میں سے 20 کے بارے میں خیال کیا جاتا ہے کہ وہ زندہ ہیں۔
مزاحمتی تنظیم نے ماضی میں ثالثوں کو بتایا تھا کہ اسے کچھ ہلاک شدہ یرغمالیوں کی لاشوں کے مقامات کا علم نہیں جس کی وجہ سے لاشوں کی رہائی میں تاخیر ہو سکتی ہے