وزیراعظم شہباز شریف کا کہنا ہے کہ حکومتیں، ادارے مل کر افغان باشندوں کی جلد واپسی یقینی بنائیں گے۔
وزیراعظم شہبازشریف کی زیرصدارت افغان پناہ گزینوں کی واپسی سے متعلق اجلاس ہوا جس میں فیلڈ مارشل عاصم منیر، وفاقی وزراتین صوبوں کے وزرائے اعلیٰ، وزیر اعظم آزاد کشمیر، وزیراعلیٰ گلگت بلتستان شریک ہوئے۔
وزیراعلیٰ خیبر پختونخوا کی عدم موجودگی پر ان کی نمائندگی مزمل اسلم نے کی۔
شہباز شریف کا کہنا تھا کہ صوبائی حکومتیں، ادارے مل کر افغان باشندوں کی جلد واپسی یقینی بنائیں گے، افغانستان سے پاکستان پرحالیہ حملہ، خوارج کی در اندازی تشویشناک ہے۔
انہوں نے کہا کہ پاکستان کی بہادر افواج نےحملے کا بھرپور انداز سےجواب دیا، فیلڈ مارشل عاصم منیر کی قیادت میں افواج پاکستان نے افغانستان کے حملوں کو پسپا کیا۔
انہوں نے کہا کہ پاکستان نے دہشت گردی کے خلاف جنگ میں ہزاروں قیمتی جانوں کی قربانی دی اور اربوں ڈالر کا معاشی نقصان برداشت کیا، افغانستان کی سرزمین سے پاکستان پر دہشت گرد حملے اور ان میں افغان شہریوں کا ملوث ہونا انتہائی تشویش ناک ہے۔
وزیراعظم نے بتایا کہ نائب وزیراعظم و وزیرِ خارجہ، وزیرِ دفاع اور دیگر اعلیٰ حکام نے متعدد بار کابل جا کر افغان نگران حکومت سے مذاکرات کیے تاکہ دہشت گردی کے لیے افغان سرزمین کے استعمال کو روکا جا سکے تاہم پاکستان کے عوام اب سوال کر رہے ہیں کہ حکومت کب تک افغان مہاجرین کا بوجھ اٹھاتی رہے گی؟
اجلاس کے اختتام پر فیصلہ کیا گیا کہ افغان پناہ گزینوں کی وطن واپسی سے متعلق تمام سفارشات پر سختی سے عمل درآمد کیا جائے گا
