حماس نے اسرائیلی یرغمالیوں کو حوالگی کیلیے 3 مقامات پر منتقل کر دیا

حماس نے زندہ اسرائیلی یرغمالیوں کو 3 مقامات پر منتقل کر دیا۔اسرائیل سے غزہ جنگ بندی معاہدہ طے پانے کے بعد قیدیوں کے تبادلے کے لیے حماس نے تیاری مکمل کر لی۔
الجزیرہ کے مطابق حماس ذائع کا کہنا ہے کہ اسرائیلی یرغمالیوں کو غزہ کے 3 مختلف مقامات پر منتقل کیا گیا ہے جنہیں پیر کو حوالے کیا جائے گا۔
تبادلے سے قبل حماس کا وفدآج رات ریڈکراس کمیٹی سے ملاقات کرے گا جس میں یرغمالیوں کی حوالگی کے طریقہ کار پر اتفاق کیا جائے گا۔
الجزیرہ کا کہنا ہے کہ حماس ذرائع کے مطابق رہائی کا عمل غزہ کے 3 مقامات پر بیک وقت انجام پائے گا۔
حماس اور ثالث ممالک کے درمیان قیدیوں کی فہرست پر رابطے جاری ہیں۔ اسرائیل کی جانب سے متعدد نام مسترد کیے جانے کے باوجود فہرست پر کام جاری ہے۔
حماس کے ایک سینئر عہدیدار نے بتایا کہ غزہ میں مزاحمتی تنظیم کے قبضے میں موجود 48 اسرائیلی یرغمالیوں کی رہائی پیر کی صبح سے شروع ہوگی۔
اسامہ حمدان نے اے ایف پی کو دیے گئے انٹرویو میں کہا کہ دستخط شدہ معاہدے کے مطابق اسرائیلی یرغمالیوں اور قیدیوں کے تبادلے کا عمل پیر کی صبح سے طے شدہ طور پر شروع ہوگا اور اس معاملے میں کوئی نئی پیشرفت نہیں ہوئی۔
حماس عہدیدار نے مزید کہا کہ زمین پر موجود حماس کے مزاحمت کاروں نے ابھی تک اسرائیلی یرغمالیوں کی حوالگی کے لاجسٹک معاملات کے بارے میں تحریک کی قیادت کو مطلع نہیں کیا