گاڑیوں کی فروخت میں زبردست اضافہ ریکارڈ

اسلام آباد : گاڑیوں کی فروخت میں زبردست اضافہ ریکارڈ کیا گیا، جو ستمبر میں 67 فیصد بڑھ گئیں۔
تفصیلات کے مطابق ستمبر دوہزار پچیس میں مہنگائی اور شرح سود میں کمی کی وجہ سے گاڑیوں کی فروخت میں اضافہ ریکارڈ کیا گیا۔
پاکستان آٹو موٹیو مینوفیکچررز ایسوسی ایشن نے بتایا کہ گزشتہ ستمبرکے مقابلے میں گاڑیوں کی فروخت میں سڑسٹھ فیصد اضافے کے ساتھ سترہ ہزار ایک سو چوہتر کاریں فروخت ہوئیں۔
اگست کے مقابلے میں ستمبر میں کاروں کی فروخت میں بائیس فیصد اضافہ ہوا، رواں مالی سال کے پہلی سہ ماہی میں تریپن فیصد اضافہ کے ساتھ بیالیس ہزار دوسو سٹرسٹھ کاریں فروخت ہوئیں۔
ماہرین کا کہنا ہے کہ فروخت میں اس بہتری کی بنیادی وجوہات شرح سود میں کمی، افراطِ زر میں کمی، بہتر معاشی استحکام اور صارفین کے اعتماد میں اضافہ ہیں، جنہوں نے مجموعی طور پر مانگ میں بہتری پیدا کی۔
دو اور تین پہیوں والی گاڑیوں کی فروخت میں 21 فیصد سالانہ اور 7 فیصد ماہانہ اضافہ ہوا، جو ستمبر میں مجموعی طور پر 1 لاکھ 58 ہزار 941 یونٹس رہی۔
پہلی سہ ماہی میں موٹر سائیکلوں کی مجموعی فروخت 4 لاکھ 32 ہزار یونٹس رہی، جو گزشتہ سال کی نسبت 35 فیصد زیادہ ہے۔
دوسری جانب ٹریکٹرز کی فروخت میں 27 فیصد سالانہ اور 21 فیصد ماہانہ کمی ریکارڈ کی گئی، جو صرف 790 یونٹس تک محدود رہی۔
ماہرین کے مطابق یہ کمی حالیہ سیلاب اور کمزور زرعی معیشت کا نتیجہ ہے۔ تاہم 2 ہزار 77 یونٹس کی پیداوار ظاہر کرتی ہے کہ حکومت کے ٹریکٹر اسکیم کے تحت مستقبل میں بہتری کا امکان موجود ہے۔