اداکار فیروز خان کی پہلی اہلیہ علیزے سلطان نے دعویٰ کیا ہے کہ فیروز خان نے اپنے بچوں کی کسٹڈی لینے سے انکار کر دیا ہے، جس کے بعد معاملہ ایک بار پھر خبروں کی زینت بن گیا ہے۔
علیزے سلطان کے مطابق وہ اس وقت اپنی بیٹی فاطمہ کے ساتھ علیحدہ رہائش پذیر ہیں، جب کہ ان کا بیٹا سلطان اپنے والد فیروز خان کے ساتھ رہ رہا ہے۔ علیزے کا کہنا ہے کہ بچوں سے متعلق معاملات پر تعاون نہ ہونے کی وجہ سے انہیں شدید ذہنی دباؤ کا سامنا ہے۔
واضح رہے کہ علیزے سلطان اور فیروز خان نے 2018 میں شادی کی تھی اور ان کے دو بچے، سلطان اور فاطمہ ہیں۔ تاہم چند ہی برسوں میں دونوں کے درمیان اختلافات شدت اختیار کر گئے، جس کے بعد علیزے سلطان کی جانب سے گھریلو تشدد کے سنگین الزامات سامنے آئے۔
یہ شادی بالآخر 2023 میں ختم ہو گئی تھی، جب کہ فیروز خان نے 2024 میں اپنی سائیکالوجسٹ ڈاکٹر زینب سے دوسری شادی کر لی۔ علیزے سلطان نے ماضی میں بھی سوشل میڈیا کے ذریعے اپنے تحفظات اور قانونی جدوجہد کا ذکر کیا ہے، جب کہ اس معاملے پر فیروز خان کی جانب سے تاحال کوئی تازہ مؤقف سامنے نہیں آیا۔
یہ تنازع ایک بار پھر شوبز حلقوں اور سوشل میڈیا پر زیر بحث ہے، جہاں صارفین بچوں کی فلاح و بہبود سے متعلق مختلف آرا کا اظہار کر رہے ہیں۔
