ای پی بی ڈی نے معاشی بحالی کیلیے شرح سود میں کمی کی سفارش کر دی

اسلام آباد (15 ستمبر 2025): معاشی تھنک ٹینک اکنامک پالیسی اینڈ بزنس ڈویلپمنٹ (ای پی بی ڈی) نے معاشی بحالی کیلیے شرح سود میں کمی کی سفارش کر دی۔
تھنک ٹینک کے مطابق حالیہ سیلاب سے زرعی شعبہ شدید متاثر ہو چکا ہے جس کے بعد معاشی بحالی کیلیے صنعتی ترقی اہم ہے، شرح سود کو 11 فیصد سے کم کر کے 9 فیصد پر لایا جائے جبکہ دوسرے مرحلے میں اس کو 9 فیصد سے کم کر کے 6 فیصد کیا جائے۔
ای پی بی ڈی نے بتایا کہ زرعی بدحالی کے بعد صنعتی ترقی ضروری ہے لہٰذا حکومت فیصلہ کرے مسابقتی فنانسنگ لاگت سے صنعتوں کو چلانا ہے یا نہیں؟ شرح سود کو کم کرنے سے حکومت کو 3 ہزار ارب روپے کی بچت ہوگی، حکومت یہ 3 ہزار ارب روپے سیلاب متاثرہ علاقوں میں تعمیر و بحالی پر خرچ کر سکتی ہے۔
صنعتی شعبہ سیلاب متاثرہ زراعت کے نقصانات کا ازالہ کر سکتا ہے۔ مہنگی انٹرسٹ ریٹ صنعتی ترقی کا راستہ روکتی ہے، پاکستان سیلاب کے بعد فیصلہ کن موڑ پر کھڑا ہے، فلڈ سے چاول کی 60 فیصد، کاٹن کی 35 فیصد اور گنے کی 30 فیصد فصل تباہ ہو چکی ہے جبکہ 40 فیصد لیبر فورس متاثر ہوئی ہے۔‘
تھنک ٹینک کے مطابق سیلاب سے جی ڈی پی کی شرح 3.4 فیصد سے کم ہو کر 3.2 فیصد ہونے کا امکان ہے جبکہ تجارتی خسارے میں ایک ارب 90 کروڑ ڈالرز اضافے کا امکان ہے، شرح سود کو 11 فیصد پر برقرار رکھنا ناقابل برداشت ہوگا، اس کو برقرار رکھنے سے معاشی بدحالی میں اضافہ ہوگا اور صنعتی ترقی رک جائے گی۔