دنیا کی امیر ترین شخصیت کا اعزاز ٹیسلا، اسپیس ایکس اور ٹوئٹر (ایکس) کے مالک ایلون مسک کو حاصل ہے جب کہ فیس بک کے بانی مارک زکر برگ، بل گیٹس بھی امیر ترین افراد کی فہرست میں شمار کیے جاتے ہیں۔
مگر حال ہی میں ایک شخص نے ایک دن میں 70 ارب ڈالر (پاکستانی کرنسی میں 197 کھرب، 93 ارب 90 کروڑ) کمائے لیکن وہ مذکورہ بالا تینوں افراد میں سے کوئی نہیں ہے۔
غیر ملکی میڈیا رپورٹ کے مطابق ایک ہی دن میں 70 ارب ڈالر کمانے والے اوریکل کے شریک بانی 81 سالہ لیری ایلیسن ہیں، جنہوں نے 1977 میں اوریکل کی بنیاد رکھی۔
کمپنی نے رواں ماہ 9 ستمبر کو صرف ایک دن میں ریکارڈ 70 ارب ڈالرز کمائے اور ان کے اثاثے بڑھ کر 364 ارب ڈالرز (1029 کھرب سے زائدپاکستانی روپے) تک جا پہنچے ہیں۔
رپورٹ کے مطابق یہ پہلا موقع ہے جب کسی ایک شخص نے ایک ہی دن میں 70 ارب ڈالرز کمائے ہوں۔ لیری ایلیسن رواں سال اب تک 172 ارب ڈالرز کما کر 2025 میں سب سے زیادہ دولت کمانے والے فرد قرار دیے جا رہے ہیں۔
اس وقت دنیا کے امیر تریخ شخص ایلون مسک ہیں، جن کی دولت کا تخمینہ 384 ارب ڈالرز لگایا گیا ہے اور لیری ایلیسن 364 ارب ڈالرز کے ساتھ دنیا کے دوسرے امیر ترین شخص بن گئے ہیں۔
ماہرین کا کہنا ہے کہ اگر لیری کے اثاثے ایسے ہی بڑھتے رہے تو وہ جلد ایلون مسک کو پیچھے چھوڑ کر دنیا کے امیر ترین شخص بن جائیں گے۔ دلچسپ بات یہ ہے کہ وہ ایلون مسک کے قریبی دوست ہیں اور ماضی میں ٹیسلا کے بورڈ آف ڈائریکٹرز کا حصہ رہ چکے ہیں
