لکھنو میں بھارت اور جنوبی افریقا کے درمیان ہونے والا چوتھا ٹی ٹوئنٹی میچ حد نگاہ کم ہونے اور شدید دھند کے باعث منسوخ کر دیا گیا۔ میچ کے ٹاس سے قبل چھ انسپکشن کے بعد آفیشلز نے میچ ختم کرنے کا اعلان کیا۔
میچ منسوخ ہونے پر شائقین نے بھارتی کرکٹ بورڈ سے ٹکٹ کی رقم واپسی کا مطالبہ کیا۔ ایک شہری نے کہا کہ میں گندم کی تین بوریاں بیچ کر یہاں میچ دیکھنے آیا تھا، اب مجھے اپنی رقم واپس چاہیے۔ دیگر شائقین نے بھی میچ دن میں کرانے کی ہدایت دینے اور رقم کی واپسی کی ضرورت پر زور دیا۔
بھارتی میڈیا نے میچ ختم ہونے کی وجہ اسموگ قرار دی اور حکومت کو تنقید کا نشانہ بنایا۔ رپورٹس کے مطابق اس دن گراؤنڈ میں کھلاڑی ماسک پہنے ہوئے تھے اور ایئر کوالٹی انڈیکس 400 تک پہنچ گیا تھا۔
سوشل میڈیا صارفین نے بھی لکھنو کے وینیو اور اسموگ کی وجہ سے بھارتی کرکٹ بورڈ کی تنقید کی اور کہا کہ سرد موسم میں اس علاقے میں میچز منعقد کرنا مناسب نہیں تھا۔
