شمالی وزیرستان : دتہ خیل میں سیکیورٹی فورسز نے کارروائی میں چھ خارجیوں کو جہنم واصل کردیا، ہلاک دہشت گردوں میں فتنہ الخوارج کا کمانڈر محبوب عرف محمد بھی شامل ہے۔
تفصیلات کے مطابق شمالی وزیرستان کے علاقے دتہ خیل میں سیکیورٹی فورسز نے خفیہ اطلاع پر کامیاب کارروائی کرتے ہوئے 6 خوارج کو جہنم واصل کردیا، جب کہ 3 دہشتگرد زخمی ہوگئے۔
سیکیورٹی ذرائع نے بتایا کہ ٹنگ کلی دتہ خیل میں دہشتگردوں کی نقل و حرکت کی خفیہ اطلاعات موصول ہونے پر سیکیورٹی فورسز نے 8 سے 10 روز تک علاقے کی نگرانی کی۔
ذرائع کا کہنا تھا کہ 16 اکتوبر کو دہشتگردوں کے ٹھکانے کا سراغ لگنے پر فورسز نے انہیں گھیرے میں لے لیا، جس کے دوران فائرنگ کا تبادلہ ہوا اور فائرنگ کے نتیجے میں 6 دہشتگرد مارے گئے جن میں فتنہ الخوارج کا کمانڈر محبوب عرف محمد بھی شامل ہے۔
سیکیورٹی فورسز کی یہ کارروائی علاقے میں امن دشمن عناصر کے خلاف جاری آپریشن کا حصہ ہے۔
ذرائع کے مطابق گزشتہ چار روز کے دوران افغان طالبان کے حمایت یافتہ 94 خوارج کو بھی جہنم واصل کیا جا چکا ہے تاہم عوام اور سیکیورٹی فورسز دہشتگردی کے ناسور کو جڑ سے اکھاڑ پھینکنے کے لیے پرعزم ہیں اور نیشنل ایکشن پلان کے تحت ملک بھر میں دہشتگردوں کے خلاف بلا امتیاز اور مسلسل کارروائیاں جاری ہیں
