بالی وڈ اداکار سدھارتھ ملہوترا کے والد سنیل ملہوترا کا انتقال ہو گیا۔ بھارتی میڈیا رپورٹس کے مطابق وہ چار روز قبل دہلی میں انتقال کر گئے۔ اداکار نے اپنے والد کے دنیا سے رخصت ہونے کی خبر سوشل میڈیا پلیٹ فارم انسٹاگرام پر ایک جذباتی پیغام کے ذریعے شیئر کی۔
سدھارتھ ملہوترا نے اپنے والد کو خراجِ عقیدت پیش کرتے ہوئے لکھا کہ وہ ایک ایماندار، باوقار اور اصولوں پر قائم رہنے والے انسان تھے جنہوں نے پوری زندگی دیانت داری سے گزاری۔ انہوں نے بتایا کہ ان کے والد مرچنٹ نیوی میں کیپٹن رہے اور سمندروں پر کمانڈ کرنے سے لے کر بیماری کا خاموشی سے مقابلہ کرنے تک کبھی سمجھوتہ نہیں کیا، حتیٰ کہ فالج کے باعث وہیل چیئر تک محدود ہو جانے کے باوجود ان کے حوصلے بلند رہے۔
اداکار نے مزید لکھا کہ “میں آج جو کچھ بھی ہوں آپ کی وجہ سے ہوں اور ہمیشہ آپ کے نام کو روشن کروں گا۔” سدھارتھ نے اپنی پوسٹ میں والد کے ساتھ بچپن کی تصاویر بھی شیئر کیں، جس پر مداحوں اور شوبز شخصیات کی جانب سے گہرے دکھ اور تعزیت کا اظہار کیا جا رہا ہے۔
