پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری کے خلاف نازیبا الفاظ استعمال کرنے پر حیدرآباد کے تھانہ ہٹڑی میں مقدمہ درج کر لیا گیا ہے۔
یہ مقدمہ پیپلز پارٹی کی ذیلی تنظیم، پیپلز اسٹوڈنٹس فیڈریشن کے مقامی رہنما کی مدعیت میں درج کیا گیا۔ مقدمے کے متن کے مطابق ہالا ناکا روڈ پر پی پی پی طلبہ ونگ کی جانب سے استقبالیہ کیمپ قائم تھا کہ گاڑی سوار ایک نامعلوم شخص مسلح گارڈز کے ہمراہ وہاں پہنچا اور پارٹی بینرز اور جھنڈے چھین لیے۔
مقدمے میں مزید کہا گیا ہے کہ نامعلوم شخص بلاول بھٹو زرداری کے خلاف نازیبا الفاظ استعمال کرتا ہوا وہاں سے فرار ہو گیا۔
پولیس نے مقدمہ درج کر کے تحقیقات شروع کر دی ہیں اور ملزم کی تلاش جاری ہے۔
