بندرگاہوں سے افغان ٹرانزٹ ٹریڈ معطل

کراچی : پاک افغان کشیدگی کے بعد کراچی بندرگاہوں سے افغان ٹرانزٹ ٹریڈ معطل کردی گئی اور تمام گیٹ پاس منسوخ کردیئے گئے۔
تفصیلات کے مطابق فیڈرل بورڈ آف ریونیو (ایف بی آر) نے پاک افغان سرحد پر حالیہ جھڑپوں کے باعث کراچی کی بندرگاہوں سے افغان ٹرانزٹ ٹریڈ کی ترسیل معطل کر دی ہے۔
اس حوالے سے ایف بی آر نے باضابطہ طور پر احکامات جاری کر دیے ہیں، جو مزید ہدایت تک نافذ العمل رہیں گے۔
ذرائع نے بتایا کہ کسٹمز ہاؤس کراچی میں ڈائریکٹوریٹ آف ٹرانزٹ ٹریڈ کے ہیڈ کوارٹر میں ایک اہم اجلاس منعقد ہوا، جس کی صدارت ڈائریکٹر جنرل افغان ٹرانزٹ ٹریڈ نے کی۔ اجلاس میں کوئٹہ اور پشاور کے ڈائریکٹرز نے ویڈیو لنک کے ذریعے شرکت کی۔
اجلاس کے بعد کسٹمز جنرل آرڈر 98.2025 جاری کیا گیا، جس کے مطابق کوئٹہ اور پشاور اسٹیشنز پر اسٹوریج کی گنجائش ختم ہونے اور کنٹینرز کی بھرمار کے باعث افغان ٹرانزٹ ٹریڈ کی ترسیل غیر معینہ مدت تک معطل کر دی گئی ہے۔
حکم نامے میں تمام ٹرمینلز کو ہدایت دی گئی کہ وہ گاڑیوں پر لوڈ شدہ کنٹینرز فوری اتاریں اور تمام گیٹ پاسز منسوخ کر دیں۔
ذرائع کا کہنا ہے کہ ایف بی آر کے احکامات کے بعد کراچی پورٹ اور پورٹ قاسم پر افغان ٹرانزٹ ٹریڈ کنٹینرز کی کلیئرنس روک دی گئی ہے۔
ساؤتھ ایشیا پاکستان ٹرمینل پر سینکڑوں کنٹینرز کی لمبی قطاریں لگ گئی ہیں، جب کہ متعدد کنٹینرز کوئٹہ اور پشاور جاتے ہوئے راستے میں ہی پھنس گئے ہیں۔ ڈرائیور حضرات سرحدی آپریشن بحال ہونے کے منتظر ہیں۔
ذرائع کا کہنا ہے کہ یہ فیصلہ پاک افغان کشیدگی میں اضافے اور سرحدی سیکیورٹی خدشات کے پیش نظر کیا گیا ہے۔