اقوام متحدہ نے پاک بھارت جنگ 2025 سے متعلق اپنی رپورٹ جاری کر دی ہے، جس میں پاکستان کے مؤقف اور بیانیے کی بھرپور تصدیق کی گئی ہے۔
اقوام متحدہ کے خصوصی ماہرین کی جانب سے جاری کردہ مفصل رپورٹ میں رواں برس مئی 2025 میں ہونے والی پاک بھارت جنگ کا جائزہ لیا گیا ہے۔ رپورٹ کے مطابق 7 مئی 2025 کو بھارت نے ’’آپریشن سندور‘‘ کے تحت پاکستان کی حدود میں طاقت کا استعمال کیا، جو اقوام متحدہ کے چارٹر کی کھلی خلاف ورزی ہے۔
رپورٹ میں کہا گیا ہے کہ اسی روز پاکستان نے بھارتی کارروائی کی شدید مذمت کرتے ہوئے اقوام متحدہ کی سلامتی کونسل کو آگاہ کیا تھا کہ وہ اقوام متحدہ کے چارٹر کے آرٹیکل 51 کے تحت اپنے دفاع کا مکمل حق محفوظ رکھتا ہے۔
خصوصی ماہرین کی رپورٹ میں واضح کیا گیا ہے کہ بھارت کی جانب سے سرحد پار طاقت کے استعمال نے خطے میں کشیدگی کو بڑھایا اور بین الاقوامی قوانین کی خلاف ورزی کی۔ رپورٹ کے مطابق پاکستان کا ردِعمل بین الاقوامی قوانین اور اقوام متحدہ کے چارٹر کے عین مطابق تھا۔
رپورٹ سامنے آنے کے بعد پاکستان کے سفارتی مؤقف کو عالمی سطح پر تقویت ملی ہے، جبکہ ماہرین کا کہنا ہے کہ یہ رپورٹ خطے میں امن و استحکام کے لیے اہم دستاویز ثابت ہو سکتی ہے۔
