بھارت کی جانب سے مبینہ آبی جارحیت پر پاکستان نے بھارت سے باضابطہ رابطہ کرتے ہوئے وضاحت طلب کر لی ہے۔
پاکستانی کمشنر برائے سندھ طاس نے یہ معاملہ باضابطہ طور پر نئی دہلی کے ساتھ اٹھایا ہے۔ انہوں نے دریائے چناب میں پانی کی غیر معمولی کمی پر بھارتی حکام سے وضاحت مانگی ہے۔
پاکستان کا مؤقف ہے کہ سیٹلائٹ تصاویر میں بگلیہار ریزروائر کو خالی کرنے اور بعد ازاں دوبارہ بھرنے کے شواہد موجود ہیں، جبکہ سندھ طاس معاہدے کے تحت ڈیڈ اسٹوریج کو خالی کرنا ممنوع ہے۔
دوسری جانب وزارتِ آبی وسائل پاکستان کے مطابق 17 دسمبر 2025 سے دریائے چناب کے بہاؤ میں نمایاں بہتری آنا شروع ہو گئی ہے۔ محکمہ آبپاشی کی جانب سے دریا کی مسلسل نگرانی جاری ہے، جبکہ پانی کے بہاؤ میں غیر معمولی کمی کے بعد اب صورتحال میں استحکام دیکھنے میں آیا ہے۔
حکام کا کہنا ہے کہ پاکستان آبی وسائل کے تحفظ کے لیے تمام دستیاب سفارتی اور قانونی آپشنز استعمال کرے گا اور معاملے کو سنجیدگی سے آگے بڑھایا جائے گا۔
