امریکی ریاست مشی گن میں دہشت گردی کی کوشش ناکام

ایف بی آئی سربراہ کاش پٹیل نے کہا ہے کہ امریکی ریاست مشی گن میں دہشت گردی کی کوشش کو ناکام بنادیا گیا ہے، اس دوران 5 ملزمان کو گرفتار کرلیا گیا ہے۔
بین الاقوامی خبر رساں ادارے کی رپورٹ کے مطابق امریکی خفیہ ادارے ایف بی آئی کے سربراہ کاش پٹیل کا کہنا تھا کہ ریاست مشی گن میں داعش سے متاثر گروہ کی جانب سے دہشت گردی کی سازش ناکام بنادی گئی ہے۔
کاش پٹیل نے بتایا کہ ہالووین ویک اینڈ پر ممکنہ حملے کا منصوبہ بنایا گیا تھا جسے ناکام بنا دیا گیا ہے۔
ایف بی آئی سربراہ نے بتایا کہ اس معاملے میں مشتبہ افراد نے ”پمپکن ڈے” کے نام سے منصوبے پر آن لائن بات چیت کی تھی۔
اُن کا کہنا تھا کہ اس حوالے سے کارروائی میں 5 افراد کو گرفتار کیا گیا ہے، گرفتار افراد میں 16 بر س کا ایک نوجوان بھی شامل ہے۔
دوسری جانب امریکا کے صدر ڈونلڈ ٹرمپ نے کہا ہے کہ کینیڈا کے وزیر اعظم مارک کارنی نے معافی مانگ لی ہے۔
ایئر فورس ون پر میڈیا سے گفتگو میں جمعہ کو صدر ڈونلڈ ٹرمپ نے کہا کہ مارک کارنی نے اونٹاریو حکومت کے اشتہار کے لیے معافی مانگی ہے جس میں رونالڈ ریگن کے ٹیرف مخالف پیغام کو نمایاں کیا گیا تھا۔
صدر ٹرمپ نے کہا کینیڈا امریکا معطل تجارتی مذاکرات دوبارہ بحال نہیں ہوئے، میں مارک کارنی کو پسند کرتا ہوں، لیکن انھوں نے جو کیا وہ غلط تھا۔
سی بی سی کا کہنا ہے کہ کینیڈین وزیر اعظم کے دفتر نے اس بات کی تصدیق نہیں کی ہے کہ آیا کارنی نے معافی مانگی ہے۔ یاد رہے کہ ٹرمپ اور کارنی نے بدھ کو ایشیا پیسیفک اکنامک کوآپریشن سمٹ میں بات چیت کی تھی۔
ٹرمپ نے کہا کارنی نے کمرشل اشتہار کے ساتھ جو کچھ کیا، اس کے لیے انھوں نے معافی مانگی کیوں کہ یہ ایک جھوٹا کمرشل تھا۔ آپ جانتے ہیں کہ معاملہ اس اشتہار کے بالکل برعکس تھا۔ رونالڈ ریگن کو ٹیرف پسند تھے لیکن اشتہار میں انھوں نے اسے دوسرے طریقے سے دکھانے کی کوشش کی۔ جس پر انھوں نے معذرت کی اور میں اسے سراہتا ہوں۔