قطر کے صنعتی شہر رأس لفان میں واقع مائع قدرتی گیس کے ایک مرکز میں ہونے والے شدید دھماکے اور اس کے نتیجے میں لگنے والی آگ سے کم از کم 54 افراد زخمی جبکہ 18 افراد لاپتا ہو گئے۔ حکام کے مطابق امدادی اور ریسکیو ٹیمیں فوری طور پر موقع پر پہنچ گئیں اور زخمیوں کو طبی امداد فراہم کرتے ہوئے قریبی اسپتالوں میں منتقل کر دیا گیا، جبکہ لاپتا افراد کی تلاش جاری ہے۔
ابتدائی اطلاعات کے مطابق حادثہ اس وقت پیش آیا جب گیس تنصیب میں آپریشنز بحال کیے جا رہے تھے۔ دھماکے کے بعد آگ بھڑک اٹھی جس پر قابو پانے کے لیے فائر بریگیڈ اور سول ڈیفنس کے اہلکاروں نے ہنگامی کارروائی کی۔
قطری وزارت داخلہ کے مطابق واقعہ ممکنہ طور پر فنی خرابی یا آپریشنل مسئلے کے باعث پیش آیا۔ حکام کا کہنا ہے کہ کسی خطرناک گیس کے اخراج کی اطلاع موصول نہیں ہوئی، تاہم واقعے کی مکمل تحقیقات شروع کر دی گئی ہیں۔
