امریکی خام تیل سے لدا بحری جہاز پاکستان میں لنگرانداز

کراچی : امریکی خام تیل سے لدا بحری جہاز پاکستان میں لنگرانداز ہوگیا، پاکستان نے 10 لاکھ بیرل ویسٹ ٹیکساس انٹرمیڈیٹ کروڈ آئل درآمد کیا ہے۔
تفصیلات کے مطابق پاکستان کے توانائی کے شعبے میں تاریخ ساز پیش رفت ہوئی ، امریکی خام تیل سے لدا سب سے بڑا تیل بردار بحری جہاز ایم ٹی پیگاسس آج پاکستان پہنچ گیا۔
جس سے پاک امریکی تجارتی معاہدے کے بعد خام تیل کی درآمد کا آغاز ہو گیا، سنرجیکو آئل کمپنی امریکی تیل کا جہازبلوچستان کے ساحل پر واقع ایس پی ایم آف شور آئل ٹرمینل پر برتھ ہوا۔
یہ پہلا موقع ہے کہ پاکستان نے 10 لاکھ بیرل ویسٹ ٹیکساس انٹرمیڈیٹ کروڈ آئل درآمد کیا ہے، ایم ٹی پیگاسس پاکستانی بندرگاہوں پر پہنچنے والا سب سے امریکی تیل بردار بڑا بحری جہاز ہوگا۔
سنرجیکو کمپنی پاکستان کی پہلی نجی کمپنی بن گئی ہے جو براہِ راست امریکہ سے خام تیل درآمد کر رہی ہے۔
سنرجیکو نے پہلے مالی سال 2017 میں بھی ملک میں اب تک کے سب سے بڑے خام تیل کے جہاز کو اپنے آف شور ٹرمینل پر لا کر ریکارڈ قائم کیا تھا تاہم کمپنی کا نومبر کے وسط میں دوسرا آئل کارگو اور تیسرا کارگو 2026 میں لانے کا منصوبہ ہے۔
امریکی تیل بردار جہاز کی آمد پاک امریکہ تجارتی تعلقات میں ایک نئے دور کا آغاز قرار دی جا رہی ہے۔
سنرجیکو حکام کا کہنا ہے کہ یہ پیش رفت نہ صرف پاکستان کی توانائی کے شعبے کے لیے ایک سنگِ میل ہے بلکہ مستقبل میں توانائی کی فراہمی کے متنوع ذرائع کو بھی فروغ دے گی۔