لاہور (29 اکتوبر 2025): وزیر اعلیٰ پنجاب مریم نواز کا کہنا ہے کہ وزیر اعظم شہباز شریف کا حالیہ دورہ امریکا دونوں ممالک کے تعلقات کے استحکام کا باعث ہوگا۔
امریکی قونصل جنرل سٹیٹس سینڈرز نے وزیر اعلیٰ پنجاب سے ملاقات کی اور ان کی مہمان نوازی پر شکریہ ادا کیا۔ مریم نواز نے امریکی سرمایہ کاروں کو صوبے میں مواقع سے فائدہ اٹھانے کی دعوت دی جبکہ ملاقات کے دوران ان سے امریکا کے نئے پولیٹیکل اینڈ اکنامک آفیسر کا تعارف کروایا گیا۔
مریم نواز نے پاک امریکا تعلقات میں گرمجوشی کو سراہتے ہوئے کہا کہ دوطرفہ تعلقات میں بہتری خوش آئند ہے، وزیر اعظم شہباز شریف کا حالیہ دورہ امریکا تعلقات کے استحکام کا باعث ہوگا، تعلقات نئی بلندیوں کو چھو رہے ہیں۔
انہوں نے کہا کہ تاریخی سیلاب کے بعد ریسکیو و ریلیف آپریشن کے بعد بحالی کا کام شروع ہو چکا ہے، سیلاب متاثرین کیلیے حکومت پنجاب کے تاریخی پیکیج پر عملدرآمد جاری ہے۔
ان کا کہنا تھا کہ پنجاب میں ثقافتی ورثے کی بحالی اور کلچرل ٹورازم کے فروغ پر کام جاری ہے، صوبہ عالمی سطح پر ٹورازم کے حب بننے کی بھرپور صلاحیت رکھتا ہے۔
’ماحول دوست پروجیکٹس سے ایئر کوالٹی انڈیکس میں بہتری آ رہی ہے۔ حکومت پنجاب سرحد پار سے آنے والی اسموگ کے اثرات کم کرنے کیلیے کوشاں ہے۔‘
اس موقع پر امریکی قونصل جنرل سٹیٹس سینڈرز کا کہنا تھا کہ سرمایہ کاری اور تجارت کے فروغ کیلیے ای بزنس پراجیکٹ قابل تحسین ہے جو سرمایہ کاروں کیلیے آسانیاں پیدا کر رہا ہے، پنجاب میں ترقیاتی کاموں کی رفتار اور معیار قابلِ تحسین ہے۔
