پشاور: علی امین گنڈا پور آج تمام ارکان اسمبلی کے اعزاز میں عشائیہ دیں گے اور کل اپنے آبائی ضلع ڈی آئی خان منتقل ہو جائیں گے۔
تفصیلات کے مطابق وزیراعلیٰ خیبرپختونخوا علی امین گنڈاپور وزیراعلیٰ ہاؤس پشاور میں ارکانِ اسمبلی سے اہم ملاقاتیں کیں۔
ملاقاتوں میں اسپیکر بابرسلیم، صوبائی وزراء، مشیران اور معاونینِ خصوصی بھی موجود تھے۔
ذرائع نے بتایا کہ نامزد وزیر اعلیٰ خیبرپختونخوا سہیل آفریدی بھی وزیراعلیٰ ہاؤس میں موجود تھے، علی امین گنڈاپور نے ارکانِ اسمبلی کی موجودگی میں استعفے پر دستخط کیے۔
ذرائع کا کہنا ہے کہ علی امین گنڈاپور آج تمام ارکانِ اسمبلی کے اعزاز میں عشائیہ دیں گے اور کل اپنے آبائی ضلع ڈی آئی خان منتقل ہو جائیں گے۔
سیاسی ذرائع کے مطابق وزیراعلیٰ ہاؤس میں ہونے والی ملاقاتوں کو آئندہ سیاسی لائحہ عمل کے حوالے سے نہایت اہم قرار دیا جا رہا ہے۔
یاد رہے گذشتہ روز سابق وزیراعلیٰ خیبر پختونخوا علی امین گنڈاپور نے اپنا استعفیٰ سوشل میڈیا پر شیئر کیا تھا۔
انھوں نے سوشل میڈیا پر استعفے کےساتھ ساتھ پیغام میں لکھا کہ بانی کے احکامات کی تعمیل میرے لیے اعزاز ہے۔
اپنی ٹوئٹ میں انھوں نے لکھا کہ صوبے کو مالی استحکام کی راہ پر گامزن کیا، ایک سال میں دہشت گردی کے چیلنج کا ڈٹ کر مقابلہ کیا، خیبر پختونخوا میں بڑے ترقیاتی منصوبے شروع کیے، کابینہ، اراکین اسمبلی اور بیوروکریسی کا شکرگزار ہوں۔
