افغان شہریوں کو ٹیکس نیٹ میں لانے کا فیصلہ

لاہور(16 اکتوبر 2025): پنجاب حکومت نے افغان شہریوں کو ٹیکس نیٹ میں لانے کا فیصلہ کرلیا۔
وزیراعلیٰ پنجاب مریم نواز کی زیر صدارت امن و امان سے متعلق اہم اجلاس ہوا جس میں افغان شہریوں کو ٹیکس نیٹ میں لانے کا فیصلہ کیا گیا ساتھ ہی غیر قانونی افغان باشندوں کا ریئل ٹائم ڈیٹا تیار کیا جائے گا۔
پنجاب حکومت نے اجلاس میں فیصلہ کیا ہے کہ غیر قانونی تارکین وطن کے لیے وسل بلوئر سسٹم متعارف کرایا جائے گا اور اطلاع دینے والے کا نام مکمل رازداری میں رکھا جائے گا۔
اس کے علاوہ پنجاب حکومت نے غیرقانونی رہائشیوں اور ان کے کاروباروں کے خلاف کومبنگ آپریشن کا فیصلہ کیا ہے جب کہ غیرقانونی غیرملکی باشندوں کو وفاقی حکومت کی پالیسی کے مطابق فوری ڈی پورٹ کیا جائے گا۔
دوسری جانب کراچی میں غیرقانونی طور پر تعمیرات کے خلاف افغان بستی میں جاری آپریشن مکمل کر لیا گیا۔
غیرقانونی تعمیرات کے خلاف کی گئی کارروائی کے دوران 350 سے زائد غیر قانونی مکانات اور دکانیں مسمار کر دی گئیں جب کہ حراست میں لیے گئے تمام افراد کو وارننگ دے کر چھوڑ دیا گیا، اس آپریشن میں انکروچمنٹ، پولیس، رینجرز و دیگر قانون نافذ کرنیوالے ادارے موجود تھے۔