2طلبا کا جعلی مقابلے میں قتل، ایس ایچ او، دیگر اہلکار مقتولین کے گھر معافی مانگنے پہنچ گئے

شکارپور: 2 طلبا کے جعلی مقابلے میں جاں بحق ہونے کے کیس میں ایس ایچ او اور دیگر اہلکاروں نے مقتولین کے گھر جاکر معافی مانگ لی۔
پانچ ماہ قبل شکارپور میں جعلی پولیس مقابلے میں 2 طلبا کو قتل کرنے کا واقعہ پیش آیا تھا، اس معاملے میں برطرف ایس ایچ او سمیت 12 اہلکاروں نے مقتولین کے گھر جاکر معافی مانگی، تحقیقات مکمل ہونے کے بعد ایس ایچ او اور دیگر اہلکاروں کو نوکری سے برطرف کردیا گیا تھا۔
برطرف ایس ایچ او سمیت 12 اہلکار سردار اختر کونھارو کی سربراہی میں مقتولین کے گھر پہنچے، پولیس اہلکاروں نے اپنی غلطی تسلیم کی اور معافی طلب کی۔
لواحقین نے مطالبہ کیا کہ پہلے تمام اہلکاروں کو باقاعدہ گرفتار کیا جائے اور عدالت میں جرم کا اعتراف کیا جائے۔
یکم جون 2025 کو نوجوان مرتضیٰ جتوئی اور امجد لہر کو جعلی پولیس مقابلے میں قتل کیا گیا تھا، عدالتی احکامات پر قائم تحقیقاتی ٹیم نے تحقیقات کے دوران مقابلے کو جعلی اور من گھڑت قرار دیا تھا۔