اسلام آباد : سعودی عرب کا اعلیٰ سطح کا کاروباری وفد پاکستان پہنچ گیا ، ابتدائی طور پر تقریباً ایک ارب ڈالر کی سرمایہ کاری کی توقع ہے۔
تفصیلات کے مطابق سعودی عرب کا اعلیٰ سطح کاروباری وفد پاکستان پہنچ گیا ہے، دفتر خارجہ نے بتایا وفد کی قیادت شہزادہ منصور بن محمد آل سعود کر رہے ہیں، جو پاک سعودی مشترکہ بزنس کونسل کے چیئرمین بھی ہیں۔
ترجمان کا کہنا تھا وفد پاکستانی قیادت، اعلیٰ سرکاری حکام، چیمبرز آف کامرس اور کاروباری گروپس سے ملاقاتیں کرے گا،دورے کا مقصد دوطرفہ تجارت اور سرمایہ کاری کے فروغ کے لیے نئے مواقع تلاش کرنا ہے۔
ترجمان نے کہا کہ یہ دورہ دونوں ممالک کے گہرے اور برادرانہ تعلقات کی عکاسی کرتا ہے اور اقتصادی و سرمایہ کاری شراکت داری کو وسعت دینے کے عزم کا مظہر ہے۔
دوسری جانب وزیراعظم کے کوآرڈینیٹر برائے سیاحت سردار یاسر الیاس نے سعودی سرمایہ کاروں کے اعزاز میں عشائیہ دیا، جس میں اعلیٰ حکام اور پاکستانی بزنس کمیونٹی کے نمائندوں نے شرکت کی، عشائیے میں سعودی وفد کی قیادت پرنس منصور بن محمد السعود نے کی۔
اس موقع پر سردار یاسر الیاس نے کہا کہ سعودی عرب پاکستان کا قریبی دوست اور اہم تجارتی شراکت دار ہے۔ سعودی سرمایہ کاری سے پاکستان میں روزگار، صنعتی ترقی اور سیاحت کے شعبے میں عالمی سطح پر فروغ کے نئے مواقع پیدا ہوں گے۔
ذرائع کے مطابق وفد نے پاکستانی کاروباری برادری سے مختلف سرمایہ کاری منصوبوں پر تفصیلی بات چیت کی، جن میں منرلز، زراعت، آئی ٹی، توانائی، انفراسٹرکچر اور سیاحت کے شعبے شامل ہیں، دونوں ممالک کے درمیان مشترکہ سرمایہ کاری منصوبوں پر پیشرفت کا بھی جائزہ لیا گیا۔
دفتر خارجہ کا کہنا تھا کہ یہ شراکت داری سعودی وژن 2030 اور پاکستان کے اقتصادی ترقیاتی ایجنڈے کے ساتھ ہم آہنگ ہے، اور توقع ہے کہ تجارت و سرمایہ کاری کے فروغ اور ترجیحی شعبوں میں تعاون مزید مضبوط ہوگا
