ایرانی سپریم لیڈر آیت اللہ مجتبیٰ خامنہ ای نے محمد باقر ذوالقدر کو اپنا سیاسی مشیر جبکہ ڈاکٹر محسن رضائی کو سپریم نیشنل سیکیورٹی کونسل میں اپنا نمائندہ مقرر کردیا۔ رہبرِ اعلیٰ نے سماجی رابطے کی ویب سائٹ ایکس پر دونوں شخصیات کے نام الگ الگ پیغامات جاری کیے۔
محمد باقر ذوالقدر کے نام پیغام میں آیت اللہ مجتبیٰ خامنہ ای نے ان کے قیمتی تجربے کو مدِنظر رکھتے ہوئے انہیں اپنا سیاسی مشیر مقرر کرنے کا اعلان کیا۔ باقر ذوالقدر اس سے قبل سپریم نیشنل سیکیورٹی کونسل کے سیکریٹری کے طور پر خدمات انجام دے چکے ہیں اور ایران کے سیکیورٹی و سیاسی امور میں بھی فعال کردار ادا کرتے رہے ہیں۔
دوسری جانب مجتبیٰ خامنہ ای نے ڈاکٹر محسن رضائی کو سپریم نیشنل سیکیورٹی کونسل میں اپنا نمائندہ مقرر کرتے ہوئے ان کے تجربے کو سراہا۔ دونوں تقرریاں ایران میں سیکیورٹی اور سیاسی امور کے حوالے سے اہم قرار دی جارہی ہیں۔
