کراچی: کمشنر کراچی سید حسن نقوی نے آٹے کی قیمت میں اضافے کا نوٹس لیتے ہوئے گراں فروشوں کے خلاف کریک ڈاؤن تیز کرنے کی ہدایت کر دی۔
ترجمان کے مطابق گزشتہ 24 گھنٹوں کے دوران 187 دکانوں پر سرکاری نرخوں کی جانچ کی گئی، جس میں گراں فروشی پر 85 دکانداروں کو مجموعی طور پر 7 لاکھ 77 ہزار روپے سے زائد جرمانے عائد کیے گئے۔
کارروائیوں کے دوران ضلع جنوبی، شرقی، وسطی، ملیر، کیماڑی، کورنگی اور غربی میں خلاف ورزی کرنے والے دکانداروں کے خلاف ایکشن لیا گیا۔ کمشنر کراچی نے ہدایت کی کہ آٹے کی سرکاری قیمت پر سختی سے عملدرآمد یقینی بنایا جائے اور گراں فروشی کسی صورت برداشت نہیں کی جائے گی، جبکہ خلاف ورزی کرنے والوں کے خلاف کارروائیاں جاری رہیں گی۔
