پاکستان کرکٹ بورڈ (پی سی بی) اور سعودی عرب کرکٹ فیڈریشن نے کرکٹ کے فروغ، جدید انفرا اسٹرکچر کی تعمیر اور باہمی تعاون کے لیے مفاہمتی یادداشت (ایم او یو) پر دستخط کر دیے ہیں، جس کے تحت جدہ میں بین الاقوامی معیار کا جدید کرکٹ اسٹیڈیم تعمیر کیا جائے گا۔
معاہدے پر چیئرمین پی سی بی محسن نقوی اور سعودی عرب کرکٹ فیڈریشن کے چیئرمین نے دستخط کیے۔ اس شراکت داری کے تحت دونوں ادارے کرکٹ انفرا اسٹرکچر کی ترقی، آپریشنل معیارات میں بہتری، استعداد کار بڑھانے اور کھیل کے فروغ کے مختلف منصوبوں پر مشترکہ طور پر کام کریں گے۔
اس موقع پر چیئرمین پی سی بی محسن نقوی نے کہا کہ پاکستان کرکٹ بورڈ سعودی عرب میں کرکٹ کے فروغ میں اپنا کردار ادا کرنے پر فخر محسوس کرتا ہے۔ ان کا کہنا تھا کہ یہ شراکت داری نہ صرف کرکٹ کی ترقی میں اہم کردار ادا کرے گی بلکہ پاکستان اور سعودی عرب کے دوستانہ تعلقات کو بھی مزید مضبوط بنائے گی۔
معاہدے کے مطابق جدید کرکٹ اسٹیڈیم کی تعمیر کے ساتھ ساتھ سعودی عرب میں نوجوان کھلاڑیوں کی تربیت، ٹیلنٹ کی تلاش اور انہیں بین الاقوامی معیار کے مواقع فراہم کرنے پر بھی خصوصی توجہ دی جائے گی۔
سعودی عرب کرکٹ فیڈریشن کے چیئرمین نے اس موقع پر کہا کہ یہ معاہدہ صرف ایک اسٹیڈیم کی تعمیر تک محدود نہیں بلکہ مملکت میں کرکٹ کے روشن مستقبل کی بنیاد رکھنے کی جانب ایک اہم پیش رفت ہے۔
