امریکی صدرڈونلڈ ٹرمپ نے عندیہ دیا ہے کہ وہ رواں سال شمالی کوریا کے رہنما کم جونگ اُن سے دوبارہ ملاقات کے خواہاں ہیں تاکہ اپنی پہلی مدت صدارت میں ناکام ہونیوالی ایٹمی مذاکراتی کوششوں کونئی زندگی دی جا سکے۔
وائٹ ہاؤس کے اوول آفس میں جنوبی کوریا کے نئے صدرلی جائے میونگ کے ساتھ ملاقات میں ڈونلڈ ٹرمپ نے کہا کہ وہ کم جونگ اُن سے “مناسب وقت” میں ملنا چاہتے ہیں۔
اس موقع پرامریکی صدرنے جنوبی کوریا میں موجود امریکی فوجی اڈے کی زمین پرامریکہ کی ملکیت کا امکان بھی ظاہر کیا، جس پرسفارتی حلقوں میں حیرت کا اظہارکیا جا رہا ہے۔
انہوں نے کم جونگ اُن کیساتھ اپنے سابقہ تعلقات کو”مثبت” قراردیتے ہوئے کہا کہ وہ انہیں بہت اچھی طرح جانتے ہیں، شاید انکی بہن کے علاوہ کوئی اتنا قریب نہیں، ٹرمپ نے امید ظاہرکی کہ یہ ملاقات اس سال ممکن ہے۔
