پبلک اکاؤنٹس کی ذیلی کمیٹی کے اجلاس کے دوران ایچ ای سی کی جانب سے مختلف یونیورسٹیوں کو دیے گئے وزیراعظم لیپ ٹاپ اسکیم فیز 2 کے کچھ لیپ ٹاپ لاپتا ہونے کا معاملہ سامنے آیا ۔
ایچ ای سی حکام کا کہنا ہے کہ رپورٹ کے مطابق غائب لیپ ٹاپس سے حکومت کو ایک کروڑ 19 لاکھ روپے سے زائد کا نقصان ہوا ہے۔
ہائر ایجوکیشن کمیشن (ایچ ای سی) حکام کےمطابق مختلف یونیورسٹیوں کو دیے گئے 784 لیپ ٹاپ ریکور کیے جا چکے ہیں تاہم 227 لیپ ٹاپ اب بھی لاپتا ہیں۔
اس کے علاوہ، یونیورسٹیوں کی جانب سے 757 لیپ ٹاپس کا ریکارڈ پیش نہیں کیا گیا ہے۔
یہ بھی انکشاف ہوا کہ چوری شدہ لیپ ٹاپ کی مد میں 11 لاکھ روپے ریکور ہوئے لیکن خزانے میں جمع نہیں کرائے گئے ۔ کمیٹی نے تحقیقات تیز کرنے اور ایف آئی آر درج کرنے کی ہدایت کر دی ۔
