پاکستان کے زرمبادلہ ذخائر تاریخ کی بلند ترین سطح پر پہنچ گئے ہیں اور پہلی مرتبہ ملکی مجموعی ڈالر ذخائر 26 ارب ڈالر کی حد عبور کر گئے۔
اسٹیٹ بینک آف پاکستان کے مطابق یوروبانڈز کی فروخت سے حاصل ہونے والے 3 ارب ڈالر اور مارکیٹ سے ڈالرز کی خریداری کے باعث ملکی ذخائر میں نمایاں اضافہ ہوا۔ مرکزی بینک کے اپنے ڈالر ذخائر بھی پہلی بار 21 ارب ڈالر سے تجاوز کر گئے ہیں۔
بینکوں کے ڈالر ذخائر کو شامل کرنے کے بعد پاکستان کے مجموعی زرمبادلہ ذخائر 26.5 ارب ڈالر تک پہنچ گئے ہیں۔ اس اضافے کے بعد تقریباً پانچ سال بعد پاکستان کے پاس ایک مرتبہ پھر تین ماہ سے زائد کی درآمدات کے لیے کافی زرمبادلہ موجود ہے۔
اعداد و شمار کے مطابق 2023 میں اسٹیٹ بینک کے پاس زرمبادلہ ذخائر تقریباً 3 ارب ڈالر تک محدود رہ گئے تھے، تاہم گزشتہ تین برسوں کے دوران مرکزی بینک نے اپنے ذخائر میں نمایاں اضافہ کرتے ہوئے انہیں 21 ارب ڈالر سے زائد تک پہنچا دیا ہے۔
ماہرین کا کہنا ہے کہ زرمبادلہ ذخائر میں اس نمایاں اضافے سے ملک کی بیرونی ادائیگیوں کی پوزیشن بہتر ہونے کے ساتھ ساتھ مستقبل قریب میں ڈالر کے مقابلے میں روپے کی قدر مستحکم رہنے کی توقع ہے۔
