مسافر طیارہ بڑے حادثے سے بال بال بچ گیا

کراچی : جدہ سے آنے والا مسافر طیارہ بڑے حادثے سے بال بال بچ گیا، پرواز میں 200 سے زائد مسافر سوار تھے، جن میں بڑی تعداد عمرہ زائرین کی تھی۔
تفصیلات کے مطابق جدہ سے لاہور آنے والی نجی ایئرلائن سیرین ایئر کی پرواز کو کراچی ایئرپورٹ پر ہنگامی لینڈنگ کرنا پڑی۔
ذرائع نے بتایا کہ تکنیکی خرابی پر کپتان نےکراچی ایئر ٹریفک کنٹرول سے ہنگامی لینڈنگ کی اجازت طلب کی اور اجازت ملنے کے بعد مسافر طیارے کو بحفاظت کراچی ایئرپورٹ پر اتار لیا۔
ذرائع کا کہنا تھا کہ پرواز میں 200 سے زائد مسافر سوار تھے جن میں بڑی تعداد عمرہ زائرین کی تھی۔
مسافرطیارے کے معائنے پر ایندھن لیکیج کا انکشاف ہوا تاہم سی اے اے انسپکٹرز نے معاملے کی تحقیقات شروع کردیں جبکہ ایئرلائن کے انجینئرز نے طیارے کی مرمت کا کام بھی شروع کر دیا ہے۔
مزئید
یاد رہے چند ماہ قبل کراچی سے لاہور آنے والی پی آئی اے کا مسافر طیارہ اس وقت خطرناک حادثے سے بال بال بچ گیا تھا جب لینڈنگ کے وقت طیارے سے پرندہ ٹکرایا۔
ذرائع نے بتایا تھا کہ گزشتہ شام کراچی سے لاہور جانے والی پی آئی اے کی پرواز پی کے 304 کی لینڈنگ کے دوران پرندہ جہاز سے ٹکرایا تھا۔
پی آئی اے ذرائع کا کہنا تھا کہ مذکورہ طیارے میں 120 سے زائد مسافر سوار تھے اور لاہور ایئرپورٹ پر لینڈنگ کے بعد جہاز کے معائنے کے بعد اس سے پرندہ ٹکرانے کے شواہد ملے ہیں۔