سندھ حکومت نے میٹرک اور انٹر کے بورڈ امتحانات میں نقل کے خاتمے کیلئے سخت ترین اقدامات کا اعلان کر دیا ہے، جس کے تحت نقل میں ملوث طلبہ اور عملے کے خلاف زیرو ٹالرنس پالیسی نافذ کر دی گئی ہے۔
وزیر جامعات اسماعیل راہو اور وزیر تعلیم سندھ سردار شاہ کے مشترکہ بیان کے مطابق نقل کرنے والے طالب علم کے تمام پرچے منسوخ کر دیے جائیں گے اور اسے نہ صرف موجودہ بلکہ آئندہ کسی بھی بورڈ امتحان میں بیٹھنے کی اجازت نہیں ہوگی۔ مزید یہ کہ امتحان کے دوران موبائل فون یا نقل کا مواد رکھنے والے طالب علم کو فوری طور پر امتحانی عمل سے خارج کر دیا جائے گا۔
حکام کا کہنا ہے کہ اگر کسی انویجیلیٹر، انٹرنل، ایکسٹرنل یا انتظامی افسر کے ملوث ہونے کے شواہد ملے تو اس کے خلاف سخت محکمانہ کارروائی کی جائے گی، جبکہ عملے کے ملوث ہونے کی صورت میں اسے نوکری سے فارغ کر دیا جائے گا۔
سندھ حکومت نے امتحانی مراکز پر نگرانی کے نظام کو مزید سخت کرنے کا بھی اعلان کیا ہے اور واضح کیا ہے کہ کسی بھی قسم کی مداخلت یا بے ضابطگی پر فوری اور سخت کارروائی عمل میں لائی جائے گی تاکہ تعلیمی نظام میں شفافیت اور میرٹ کو یقینی بنایا جا سکے۔
