مراد علی شاہ نے اعلان کیا ہے کہ صوبے میں رجسٹرڈ موٹر سائیکل مالکان کو 2 ہزار روپے کی پیٹرول سبسڈی دی جائے گی۔
کراچی میں پریس کانفرنس کرتے ہوئے انہوں نے بتایا کہ یہ سبسڈی صرف ان شہریوں کو ملے گی جن کی موٹر سائیکل ان کے نام پر رجسٹرڈ ہے۔ درخواست دینے کے لیے محکمہ ایکسائز اینڈ ٹیکسیشن کی ویب سائٹ پر رجسٹریشن چیک کی جا سکتی ہے۔
وزیراعلیٰ سندھ کے مطابق موٹر سائیکل کی منتقلی کی فیس ختم کر دی گئی ہے اور محکمہ ایکسائز کے دفاتر صبح سے رات تک کھلے رہیں گے، جبکہ ہفتہ اور اتوار کو بھی سہولت دستیاب ہوگی۔
انہوں نے کہا کہ سبسڈی کا عمل مکمل طور پر خودکار ہوگا اور رقم براہ راست درخواست دہندہ کے بینک اکاؤنٹ میں منتقل کی جائے گی، بشرطیکہ بینک اکاؤنٹ اور موٹر سائیکل دونوں اسی شخص کے نام پر ہوں۔
مراد علی شاہ کے مطابق سندھ میں تقریباً 6.7 ملین رجسٹرڈ موٹر سائیکلیں موجود ہیں اور اپریل کے دوران سبسڈی کی ادائیگی یقینی بنائی جائے گی۔ انہوں نے واضح کیا کہ اگر کسی شخص کے نام پر ایک سے زائد موٹر سائیکلیں ہوں تو بھی صرف ایک سبسڈی دی جائے گی۔
درخواست دینے کے لیے شہریوں کو اپنی شناختی کارڈ اور موٹر سائیکل رجسٹریشن نمبر درج کرنا ہوگا، جس کے بعد موبائل پر موصول ہونے والے کوڈ کی تصدیق کے بعد بینک اکاؤنٹ کی تفصیلات فراہم کرنا ہوں گی۔
