بھارت کے دارالحکومت دہلی میں ایک ہوٹل میں لگنے والی شدید آگ کے نتیجے میں کم از کم 21 افراد جان کی بازی ہار گئے جبکہ متعدد افراد زخمی ہو گئے ہیں۔
ریسکیو حکام کے مطابق امدادی کارروائیوں کے دوران 40 سے زائد افراد کو بحفاظت عمارت سے نکال لیا گیا، تاہم کئی افراد نے آگ سے بچنے کے لیے عمارت سے چھلانگیں لگائیں جس کے باعث وہ زخمی ہو گئے۔
مقامی انتظامیہ کے افسر جیتندر کمار کا کہنا ہے کہ ابتدائی تحقیقات سے معلوم ہوتا ہے کہ عمارت کے گراؤنڈ فلور پر قائم ایک ریسٹورنٹ سے آگ بھڑکی، تاہم آتشزدگی کی حتمی وجہ جاننے کے لیے تحقیقات جاری ہیں۔
حکام نے واقعے کی مکمل انکوائری شروع کر دی ہے تاکہ حادثے کے اسباب اور ممکنہ غفلت کا تعین کیا جا سکے۔
بھارتی وزیرِ اعظم نریندر مودی نے قیمتی جانوں کے ضیاع پر گہرے دکھ کا اظہار کرتے ہوئے متاثرہ خاندانوں سے تعزیت اور ہمدردی کا اظہار کیا ہے، جبکہ زخمیوں کی جلد صحت یابی کے لیے نیک تمناؤں کا بھی اظہار کیا۔
