نئی دہلی: مشرق وسطیٰ میں جاری کشیدگی اور عالمی سطح پر خام تیل کی سپلائی متاثر ہونے کے باعث بھارت میں ایندھن کے بحران میں شدت آ گئی ہے، جس کے بعد حکومت نے ڈیزل کی فروخت پر نئی پابندیاں عائد کر دی ہیں۔
برطانوی خبر رساں ادارے رائٹرز کے مطابق، بھارتی سرکاری آئل کمپنیاں ایندھن کی بڑھتی ہوئی طلب کو پورا کرنے میں مشکلات کا سامنا کر رہی ہیں، جس کے پیش نظر مودی حکومت نے ہنگامی اقدامات کا فیصلہ کیا ہے۔
رپورٹ کے مطابق پیٹرول پمپ مالکان کو ہدایت جاری کی گئی ہے کہ وہ ایک گاڑی یا صارف کو روزانہ 200 لیٹر سے زیادہ ڈیزل فروخت نہ کریں۔ اس کے علاوہ تجارتی صارفین کو عام ریٹیل پمپس سے ایندھن خریدنے سے بھی روک دیا گیا ہے۔
ماہرین کے مطابق مشرق وسطیٰ کی غیر یقینی صورتحال اور خام تیل کی ترسیل میں ممکنہ رکاوٹوں کے باعث خطے کے کئی ممالک کو توانائی سے متعلق چیلنجز کا سامنا کرنا پڑ سکتا ہے۔
