بھارتی ریاست پنجاب کے شہر لدھیانہ میں چوری کے الزام میں ایک شخص کو ہجوم کی جانب سے مبینہ طور پر تشدد کا نشانہ بنانے کا واقعہ سامنے آیا ہے، جس کی ویڈیو سوشل میڈیا پر وائرل ہوگئی۔
بھارتی میڈیا رپورٹس کے مطابق شہریوں نے مذکورہ شخص کو پکڑ کر ایک بینک کے احاطے میں لے گئے، جہاں اسے کھمبے سے باندھ دیا گیا۔ اس کے گلے میں ایک پلے کارڈ بھی لٹکایا گیا، جس پر ہندی اور پنجابی زبان میں “میں چور ہوں” تحریر تھا۔
رپورٹس کے مطابق متاثرہ شخص کو جسمانی تشدد کا نشانہ بنایا گیا، جبکہ اس کے سر کے ایک حصے اور بھنوؤں کے بال بھی مونڈ دیے گئے۔ واقعے کی ویڈیو بنا کر سوشل میڈیا پر شیئر کی گئی، جس کے بعد یہ تیزی سے وائرل ہوگئی۔
میڈیا رپورٹس میں عینی شاہدین اور دستیاب فوٹیج کے حوالے سے دعویٰ کیا گیا ہے کہ متاثرہ شخص کو قید کی حالت میں اعترافِ جرم کرنے پر بھی مجبور کیا گیا۔
واقعے کی ویڈیو منظر عام پر آنے کے بعد پولیس نے نوٹس لیتے ہوئے مقدمہ درج کر لیا ہے اور مزید تحقیقات کا آغاز کر دیا گیا ہے۔
