تل ابیب: اسرائیل کے اپوزیشن لیڈر یائر لیپڈ نے وزیراعظم بنجمن نیتن یاہو کی پالیسیوں پر سخت تنقید کرتے ہوئے کہا ہے کہ وہ ملک کو تباہی کی طرف دھکیل رہے ہیں۔
اپنے بیان میں یائر لیپڈ کا کہنا تھا کہ موجودہ حکومتی فیصلے نہ صرف اسرائیل بلکہ اس کی فوج کیلئے بھی خطرناک ثابت ہو رہے ہیں۔ انہوں نے الزام عائد کیا کہ نیتن یاہو کی قیادت کے باعث اسرائیلی فوج کی لڑنے کی صلاحیت متاثر ہو رہی ہے۔
اپوزیشن لیڈر نے مزید کہا کہ فوج کو سیاسی مقاصد کیلئے استعمال کیا جا رہا ہے، جس سے دفاعی اداروں کا ڈھانچہ کمزور ہو رہا ہے۔ ان کا کہنا تھا کہ فوجیوں کو بغیر کسی واضح حکمت عملی کے خطرناک جنگی حالات میں بھیجا جا رہا ہے، جو کہ ایک سنگین مسئلہ ہے۔
یائر لیپڈ نے خبردار کیا کہ اگر یہی صورتحال برقرار رہی تو اسرائیل ایک ایسے بحران کی طرف بڑھ سکتا ہے جہاں سے واپسی ممکن نہیں ہوگی۔ انہوں نے فوجیوں کی زندگیوں کو خطرے میں ڈالنے پر بھی تشویش کا اظہار کیا۔
یہ بیانات ایسے وقت میں سامنے آئے ہیں جب اسرائیل میں نیتن یاہو حکومت کے خلاف عوامی احتجاج اور سیاسی دباؤ میں مسلسل اضافہ ہو رہا ہے۔ مبصرین کے مطابق اپوزیشن کی جانب سے فوج کی کمزوری کا معاملہ اٹھانا وزیراعظم کیلئے آنے والے دنوں میں مزید مشکلات پیدا کر سکتا ہے۔
