کراچی کے علاقے اورنگی ٹاؤن میں شوہر کے مبینہ قتل کیس میں گرفتار لیڈی پولیس اہلکار دعا نے دورانِ تفتیش اپنے جرم اور خاندانی تنازع کا اعتراف کر لیا ہے، جس کے بعد کیس میں اہم پیش رفت سامنے آئی ہے۔
پولیس کے مطابق نوجوان حمزہ کی موت کو ابتدا میں خودکشی قرار دینے کی کوشش کی گئی تھی، تاہم کرائم سین کے شواہد سے یہ بات واضح ہو گئی ہے کہ اسے قتل کیا گیا اور واقعے کو خودکشی کا رنگ دینے کی کوشش کی گئی۔
تفتیشی حکام نے بتایا کہ چند روز قبل مرکزی ملزم فہد اور مقتول حمزہ کے درمیان جھگڑا بھی ہوا تھا، جس میں دھمکیاں دی گئی تھیں۔
پولیس کا کہنا ہے کہ گرفتار لیڈی پولیس اہلکار دعا چند سال قبل پولیس میں بھرتی ہوئی تھی اور ابتدائی تفتیش میں اس نے اپنے سابق شوہر فہد اور موجودہ شوہر حمزہ سے متعلق تنازع اور قتل کی مبینہ سازش کا اعتراف کیا ہے۔
تحقیقات کے مطابق دعا نے پہلے فہد سے شادی کی تھی، جس سے اس کے تین بچے ہیں۔ بعد ازاں فہد اور حمزہ کے درمیان دوستی ختم ہونے کے بعد تنازع بڑھا، اور بعد میں دعا نے حمزہ سے شادی کر لی۔
پولیس کا کہنا ہے کہ دوسری شادی کے بعد بھی تعلقات میں کشیدگی برقرار رہی، جس کے بعد مبینہ طور پر فہد اور دعا نے مل کر حمزہ کے قتل کی سازش تیار کی۔
واقعے کے بعد پولیس نے لیڈی اہلکار دعا کو گرفتار کر لیا ہے جبکہ مفرور ملزم فہد کی گرفتاری کے لیے چھاپے مارے جا رہے ہیں۔ پولیس کے مطابق ملزم کو جلد قانون کے کٹہرے میں لانے کے لیے ٹیمیں تشکیل دے دی گئی ہیں۔
