کویت: کویت کی قومی فضائی کمپنی “کویت ایئرویز” نے ملکی فضائی حدود کی بندش کے بعد تمام آمد و رفت کی پروازوں کو عارضی طور پر معطل کرنے کا اعلان کر دیا ہے۔
غیر ملکی میڈیا رپورٹس کے مطابق یہ فیصلہ متعلقہ حکام کی جانب سے 11 جون 2026 کو جاری کردہ ہدایات کی روشنی میں کیا گیا۔ کویت ایئرویز کی جانب سے جاری بیان میں کہا گیا ہے کہ فضائی تحفظ اور مسافروں کی سلامتی کو مدنظر رکھتے ہوئے احتیاطی تدابیر کے طور پر تمام فلائٹ آپریشنز عارضی طور پر بند کیے جا رہے ہیں۔
ایئرلائن کے مطابق پروازوں کی معطلی اس وقت تک برقرار رہے گی جب تک ملکی فضائی حدود کو دوبارہ کھولنے کی اجازت نہیں مل جاتی۔ فضائی حدود بحال ہوتے ہی متاثرہ پروازوں کا نیا شیڈول جاری کر دیا جائے گا اور مسافروں کو فوری طور پر آگاہ کیا جائے گا۔
کویت ایئرویز نے مزید بتایا کہ وہ مسافر جو موجودہ صورتحال کے باعث اپنے سفری منصوبوں میں تبدیلی یا منسوخی کرنا چاہتے ہیں، انہیں مقررہ مدت کے دوران کسی قسم کی ترمیمی یا منسوخی فیس ادا نہیں کرنا پڑے گی۔
