کراچی: محکمہ موسمیات نے محرم الحرام 1448 ہجری کے چاند سے متعلق الرٹ جاری کرتے ہوئے کہا ہے کہ نئے چاند کی پیدائش 15 جون کو صبح 7 بج کر 54 منٹ پر ہوگی، تاہم اسی روز ملک بھر میں چاند نظر آنے کے امکانات نہ ہونے کے برابر ہیں۔
محکمہ موسمیات کے مطابق 29 ذوالحج، یعنی 15 جون کی شام محرم کا چاند نظر آنے کی توقع نہیں، حالانکہ ملک کے بیشتر علاقوں میں موسم صاف یا جزوی طور پر ابر آلود رہنے کا امکان ہے۔
جاری کردہ تفصیلات کے مطابق پنجاب میں چاند رات 7 بج کر 59 منٹ پر غروب ہوگا، جبکہ سندھ میں چاند غروب ہونے کا وقت رات 8 بج کر 5 منٹ بتایا گیا ہے۔ آزاد کشمیر میں چاند رات 8 بج کر 7 منٹ تک افق پر موجود رہے گا، جب کہ گلگت بلتستان میں چاند رات 8 بج کر 12 منٹ پر غروب ہوگا۔
اسی طرح خیبرپختونخوا میں چاند رات 8 بج کر 23 منٹ پر غروب ہوگا، جبکہ بلوچستان میں چاند سب سے آخر میں رات 8 بج کر 34 منٹ پر غروب ہونے کی پیش گوئی کی گئی ہے۔
محکمہ موسمیات کا کہنا ہے کہ فلکیاتی اعداد و شمار کے مطابق 15 جون کو محرم الحرام کا چاند نظر آنے کے امکانات انتہائی کم ہیں۔
