اسلام آباد: پاکستان اور ایران نے دوطرفہ تجارتی تعلقات کو مزید مضبوط بنانے اور تجارت کے حجم کو 10 ارب ڈالر تک بڑھانے پر اتفاق کرلیا۔
پاکستان اور ایران کی مشترکہ تجارتی کمیٹی کے دسویں اجلاس کے اختتامی روز متفقہ منٹس پر دستخط کیے گئے، جس میں آزاد تجارتی معاہدے کو جلد حتمی شکل دینے، ٹیرف میں کمی اور کسٹمز کلیئرنس کے مسائل حل کرنے کے اقدامات پر اتفاق کیا گیا۔
وزیر تجارت کے مطابق دونوں ممالک نے سرحدی راستوں پر مال بردار گاڑیوں کی بلا تعطل آمدورفت، 24 گھنٹے کسٹمز کلیئرنس کی سہولت اور تجارتی رکاوٹوں کے خاتمے کے لیے طریقہ کار وضع کرنے کا فیصلہ کیا ہے۔
اجلاس میں سرحدی تجارت، بارٹر ٹریڈ، کاروباری روابط کے فروغ اور دونوں ممالک کے درمیان تجارتی وفود کے تبادلوں پر بھی اتفاق کیا گیا۔
ایرانی وزیر نے کہا کہ فیصلوں پر مؤثر عملدرآمد سے دونوں ممالک میں معاشی تعاون بڑھے گا، عوامی فلاح میں اضافہ ہوگا اور 10 ارب ڈالر کے تجارتی ہدف کے حصول میں مدد ملے گی۔
تین روزہ مذاکرات میں تجارت، سرمایہ کاری اور اقتصادی تعاون کے مختلف شعبوں پر اتفاق رائے ہوا، جبکہ طے شدہ فیصلوں پر عملدرآمد کے لیے تکنیکی کمیٹیوں کو فعال کرنے کا فیصلہ بھی کیا گیا۔
