چین نے مشرقِ وسطیٰ میں بڑھتی ہوئی کشیدگی پر گہری تشویش کا اظہار کرتے ہوئے تمام متعلقہ فریقوں سے فوری طور پر فوجی کارروائیاں روکنے اور تنازعات کے حل کے لیے سفارتی ذرائع اختیار کرنے کی اپیل کی ہے۔
غیر ملکی خبر رساں ادارے کے مطابق چین کی وزارت خارجہ کے ترجمان لن جیان نے معمول کی پریس بریفنگ کے دوران کہا کہ بیجنگ خطے میں جنگی سرگرمیوں میں اضافے پر تشویش رکھتا ہے، بالخصوص ایسے وقت میں جب امریکا کی جانب سے ایران پر تازہ حملوں کی اطلاعات سامنے آ رہی ہیں۔
انہوں نے تمام فریقوں پر زور دیا کہ وہ تحمل کا مظاہرہ کریں، مذاکرات اور بات چیت کی جانب واپس آئیں اور خطے میں امن کے قیام کے لیے جاری سفارتی و ثالثی کوششوں کا مثبت جواب دیں۔
چینی ترجمان کا کہنا تھا کہ مسائل کا پائیدار حل صرف مذاکرات اور سفارتی ذرائع سے ہی ممکن ہے، جبکہ موجودہ کشیدگی نہ صرف مشرقِ وسطیٰ بلکہ عالمی امن و استحکام کے لیے بھی خطرات پیدا کر سکتی ہے۔
