لاہور ہائیکورٹ نے خاتون ڈاکٹر کی نازیبا ویڈیو بنا کر بلیک میل کرنے والے ملزم اسرار مجید کی ضمانت درخواست خارج کردی۔
جسٹس وحید خان نے کیس کی سماعت کی، جس دوران ایف آئی اے کی جانب سے ڈپٹی اٹارنی جنرل راجہ اخرم عدالت میں پیش ہوئے۔
سرکاری وکیل کے مطابق ملزم نجی اسپتال میں بطور ڈرائیور ملازم تھا، نوکری سے نکالے جانے کے بعد اس نے گارڈ کے ساتھ مل کر ڈاکٹر کے گھر کے واش روم میں خفیہ کیمرے نصب کیے۔
عدالت کو بتایا گیا کہ ملزم نے ویڈیو بنا کر خاتون ڈاکٹر سے 25 لاکھ روپے طلب کیے، جس پر ایف آئی اے نے ڈاکٹر کے بیٹے کی درخواست پر کارروائی کرتے ہوئے ملزم کو گرفتار کیا۔
ملزم کے وکیل نے مؤقف اپنایا کہ ملزم گزشتہ 10 ماہ سے جیل میں ہے اور اصل حقائق ٹرائل میں سامنے آئیں گے۔
بعد ازاں عدالت نے ضمانت درخواست مسترد کرتے ہوئے قرار دیا کہ ملزم کے مبینہ اقدامات اسے ضمانت کا مستحق نہیں بناتے۔
