سیلاب کا خطرہ، این ڈی ایم اے نے متعدد علاقوں میں الرٹ جاری کردیا

اسلام آباد: ملک کے مختلف علاقوں میں ممکنہ سیلاب کے پیش نظر نیشنل ڈیزاسٹر مینجمنٹ اتھارٹی (این ڈی ایم اے) نے 17 ستمبر تک ہائی رسک علاقوں کے لیے الرٹ جاری کردیا۔

این ڈی ایم اے کے نیشنل ایمرجنسیز آپریشن سینٹر کے مطابق گلگت بلتستان، خیبرپختونخوا، پنجاب اور بلوچستان کے مختلف علاقوں میں سیلاب کا خدشہ ہے۔ بالائی علاقوں میں متوقع بارشوں کے باعث دریاؤں، ندی نالوں اور برساتی نالوں میں پانی کے بہاؤ میں اضافے کا امکان ظاہر کیا گیا ہے۔

متاثر ہونے والے ممکنہ علاقے

گلگت بلتستان: دیامر، غذر، اشکومن، گپس، یاسین، نگر، ہنزہ، شمشال، اسکردو اور شگر میں سیلابی صورتحال کا خطرہ ہے۔

خیبرپختونخوا: اپر دیر، سوات، باجوڑ، ملاکنڈ، کرم، کوہستان، مہمند اور اورکزئی میں ممکنہ سیلاب سے خبردار کیا گیا ہے۔

بلوچستان: ژوب، شیرانی اور موسیٰ خیل کے علاقوں میں بھی سیلاب کا خدشہ ظاہر کیا گیا ہے۔

پنجاب: اسلام آباد، راولپنڈی، گوجرانوالہ، سرگودھا، جھنگ، ٹوبہ ٹیک سنگھ اور شیخوپورہ کے شہری علاقوں میں سیلابی صورتحال کا امکان ہے۔

این ڈی ایم اے نے ممکنہ خطرات کے پیش نظر تمام متعلقہ اداروں کو پیشگی الرٹ جاری کرتے ہوئے ضروری مشینری، عملہ اور امدادی انتظامات تیار رکھنے کی ہدایت کردی ہے۔