قومی ٹیسٹ ٹیم کی پہلے ٹیسٹ میں شکست کے بعد ڈریسنگ روم میں ہونے والی ٹیم میٹنگ کی اندرونی تفصیلات سامنے آ گئی ہیں۔ ذرائع کے مطابق کپتان بابر اعظم اور ہیڈ کوچ سرفراز احمد نے کھلاڑیوں سے مختصر مگر اہم گفتگو کی۔
ذرائع کے مطابق بابر اعظم نے کہا کہ ٹیم کی بیٹنگ مسلسل ناکام ہو رہی ہے، جبکہ حریف ٹیموں کے ٹیل اینڈرز بھی رنز بنا رہے ہیں۔ انہوں نے زور دیا کہ ایک ہی غلطیوں کو دہرانے کے بجائے مسائل کا مؤثر حل تلاش کرنا ہوگا۔
دوسری جانب ہیڈ کوچ سرفراز احمد نے کھلاڑیوں کو سخت پیغام دیتے ہوئے کہا کہ ٹیم یہاں ہارنے کے لیے نہیں آئی، جیت ہر صورت ہدف ہونی چاہیے۔ ان کا کہنا تھا کہ ہر کھلاڑی کو اپنی ذمہ داری نبھانا ہوگی، بصورت دیگر مشکلات میں اضافہ ہوتا جائے گا۔
ادھر ذرائع کا کہنا ہے کہ سابق ٹیسٹ کپتان شان مسعود کے ویسٹ انڈیز کے خلاف دوسرے ٹیسٹ میں شرکت کے امکانات کم ہیں۔ انہیں دورۂ انگلینڈ سے قبل انجری ری ہیب مکمل کروائی جائے گی، تاہم ٹیم مینجمنٹ ان کی مکمل فٹنس کے لیے پُرامید ہے۔
