اسلام آباد ہائی کورٹ کے فیصلے کی روشنی میں اسٹیٹ بینک آف پاکستان نے ملک بھر کے تمام بینکوں کو ہدایت جاری کی ہے کہ وہ کسی بھی شہری کا بینک اکاؤنٹ بغیر قانونی جواز یا مناسب تصدیق کے بلاک نہ کریں۔
اسٹیٹ بینک کی جانب سے جاری نئے ہدایت نامے میں واضح کیا گیا ہے کہ بینک احتیاطی بنیادوں پر یا بلاوجہ اکاؤنٹس منجمد کرنے سے گریز کریں اور اکاؤنٹ ہولڈرز پر غیر ضروری پابندیاں عائد کرکے انہیں مالی نقصان نہ پہنچائیں۔
مرکزی بینک نے اسلام آباد ہائی کورٹ کے جسٹس ارباب محمد طاہر کے فیصلے کے بعد بینکوں کے لیے نئی گائیڈ لائنز بھی جاری کر دی ہیں، جن کے مطابق صرف قانونی اختیار اور مکمل تصدیق کی صورت میں ہی کسی اکاؤنٹ کے خلاف کارروائی کی جا سکتی ہے۔
اسٹیٹ بینک نے تمام بینکوں پر زور دیا ہے کہ وہ نئے ضوابط پر سختی سے عمل درآمد یقینی بنائیں تاکہ صارفین کے حقوق کا تحفظ ممکن بنایا جا سکے۔
