محرم الحرام کا چاند نظر نہ آنے کے باعث نئے اسلامی سال 1448 ہجری کا آغاز 17 جون سے ہو گیا ہے، جبکہ یومِ عاشور اب 26 جون بروز جمعہ کو منایا جائے گا۔ اس صورتحال کے نتیجے میں سرکاری ملازمین کے لیے مسلسل چار روزہ تعطیلات کا امکان پیدا ہو گیا ہے۔
ہر سال وفاقی حکومت 9 اور 10 محرم الحرام کے موقع پر سرکاری تعطیلات کا اعلان کرتی ہے تاکہ ملک بھر میں مجالس، جلوسوں اور دیگر مذہبی سرگرمیوں کے دوران سیکیورٹی اور انتظامی امور مؤثر انداز میں انجام دیے جا سکیں۔
چاند نظر نہ آنے کے بعد 9 محرم 25 جون بروز جمعرات جبکہ 10 محرم، یومِ عاشور 26 جون بروز جمعہ کو ہوگا۔ ان دو سرکاری تعطیلات کے فوراً بعد ہفتہ اور اتوار کی ہفتہ وار چھٹیاں بھی آ رہی ہیں، جس کے باعث سرکاری ملازمین کو چار روز مسلسل تعطیلات ملنے کا امکان ہے۔
اگرچہ یومِ عاشور کی متوقع تاریخوں کا تعین ہو چکا ہے، تاہم تعطیلات سے متعلق حتمی اور باضابطہ نوٹیفکیشن وفاقی حکومت کی جانب سے جاری کیا جائے گا، جس کے بعد سرکاری چھٹیوں کے شیڈول کی تصدیق ہو سکے گی۔
دوسری جانب خیبر پختونخوا حکومت نے یکم محرم الحرام 1448 ہجری کے موقع پر صوبے بھر میں عام تعطیل کا اعلان کر دیا ہے۔ اس حوالے سے محکمہ ایڈمنسٹریشن نے باقاعدہ اعلامیہ بھی جاری کر دیا ہے، جس کے مطابق صوبے میں یکم محرم کو سرکاری تعطیل ہوگی۔
